Fikrət Əmirov adına Gəncə Dövlət Filarmoniyasının təqdim etdiyi “Gəncə və gəncəlilər” layihəsi çərçivəsində tarzən Zərif Qayıbovun əziz xatirəsinə həsr olunmuş konsert proqramı keçirilib.
Filarmoniyadan AZƏRTAC-a bildirilib ki, proqram Gəncə Dövlət Filarmoniyasının Xalq Çalğı Alətləri Orkestrinin müşayiəti ilə reallaşıb. Orkestrin bədii rəhbəri və dirijoru Xəyal Qəhrəmanovdur.
Gecədə Beynəlxalq Muğam Mərkəzinin solisti Vasif Yusifov, filarmoniyanın solistləri Rüstəm Cəfərov, Samirə Hacıyeva, Musa Bayramov, Vüsal Namazov, Fuad Ramazanov, Firdovsi Firdovsizadə, Zəminə Mustafayeva və Respublika və beynəlxalq müsabiqələr laureatı Mirnofəl Həsənov çıxış ediblər.
Proqram çərçivəsində Fikrət Əmirovun “Təntənəli rəqs” və “Lay-lay”, Süleyman Ələsgərovun “Sərvi xuramanım mənim” və “Şalaxo”, Vasif Adıgözəlovun “Qərənfil”, Səid Rüstəmovun “Şeir deyilmi”, Ramiz Mirişlinin “Doğma diyar” əsərləri, eləcə də “Şur” muğamı və Həsən Rzayevin “Cahargah rapsodiyası” səsləndirilib.