“Prezident İlham Əliyev Qarabağ Universitetini Xankəndi şəhərində yaratmaqla tarixi ədaləti bərpa etdi”.
Bunu “Report”a açıqlamasında Milli Məclisin Elm və təhsil komitəsinin sədri, Azərbaycan Milli Elmlər Akademiyasının müxbir üzvü, professor Bəxtiyar Əliyev deyib.
Onun sözlərinə görə, Azərbaycan Prezidentinin 28 noyabr 2023-cü tarixli sərəncamı ilə Qarabağ Universitetinin yaradılması tarixi hadisədir:
“Düz 50 il bundan əvvəl – 28 noyabr 1973-cü ildə ulu öndər Heydər Əliyevin təşəbbüsü ilə Xankəndi şəhərində Azərbaycan Dövlət Pedaqoji İnstitutunun filialı yaradılıb. O zaman Xankəndi şəhərində müstəqil ali təhsil müəssisəsinin yaradılmasında məqsəd Qarabağ və Şərqi Zəngəzur iqtisadi rayonlarının ərazisində yaşayan vətəndaşlarımızın ali təhsil alması, ümumtəhsil məktəblərimizin müəllimlərlə təmin edilməsi idi. Bu, həm də rayonlarımızda ziyalı potensialının gücləndirilməsinə, əhalinin maarifləndirilməsinə və erməni separatizminin qarşısının alınmasına xidmət edirdi”.
“Təəssüf ki, Ermənistanın təhriki və ovaxtkı sovet rəhbərliyinin fəaliyyətsizliyi nəticəsində erməni daşnaklar, separatçılar Qarabağda azərbaycanlılara qarşı böyük faciələr – soyqırımı və etnik təmizləmə törətdilər. Bunun qarşısını almaq əvəzinə SSRİ Nazirlər Soveti 16 oktyabr 1988-ci ildə Xankəndi Pedaqoji İnstitutunun bağlanması haqqında qərar qəbul etdi. Bütün azərbaycanlı professor-müəllim heyəti və tələbələr Xankəndi şəhərindən bu yolla çıxarıldılar. Bu da azərbaycanlılara qarşı həyata keçirilən etnik təmizləmə planının bir tərkib hissəsi idi”, – o qeyd edib.
Milli Məclisin üzvü əlavə edib ki, müzəffər Ali Baş Komandan İlham Əliyev rəşadətli ordusu ilə 44 günlük Vətən müharibəsində Qarabağı və Şərqi Zəngəzuru erməni-faşist işğalçılarından azad edərək şanlı Zəfər tariximizi yazdı:
“İndi həmin bölgələrdə böyük quruculuq işləri gedir və bölgə cənnətə çevrilir. Qarabağın və Şərqi Zəngəzurun inkişafının İntibah dövrü başlayıb. İşğaldan azad edilmiş ərazilərin iqtisadi potensialı, aparılan bərpa-quruculuq işləri, eləcə də əmək bazarının tələbləri regionda yüksəkixtisaslı kadrların hazırlığını həyata keçirən ali təhsil müəssisəsinin təşkilini zəruri edib. Hesab edirik ki, Prezident İlham Əliyev Qarabağ Universitetini yaratmaqla bir tərəfdən tarixi ədaləti bərpa etdi, digər tərəfdən isə doğma diyarı yenidən qurmaq üçün həmin bölgədən olan gənclərin bu universitetdə təhsil alaraq yüksəkixtisaslı kadrlara çevrilməsinə, bölgənin sürətlə inkişaf etdirilməsinə imkan yaratdı. Əminəm ki, Qarabağ Universiteti dünyanın ən müasir təhsil müəssisəsi olacaq və Azərbaycanın inkişafına böyük töhfələr verəcək”.
Qeyd edək ki, Azərbaycan Prezidenti İlham Əliyevin noyabrın 28-də imzaladığı Sərəncama əsasən, Xankəndidə Qarabağ Universiteti yaradılacaq. Nazirlər Kabinetinə iki ay müddətində universitetin nizamnaməsini təsdiq edərək bu barədə Azərbaycan Prezidentinə məlumat verəcək.